Fara í efni

Jökulsárgljúfur I, 9. júlí 2022

Efri hluti gljúfranna, hægt að velja lengri eða styttri gönguleiðir.

Dagsferð frá Akureyri sem hentar öllum aldurshópum. 

Lagt af stað frá Akureyri kl. 08:00 og haldið austur að Dettifossi en á leiðinni er stutt þægindastopp í Mývatnssveit. Góður tími til að skoða tvo mikilfenglega fossa, Dettifoss og Selfoss og nánasta umhverfi þeirra. Því næst er útsýnisstopp við Hafragilsfoss áður en haldið er í Hólmatungur en þar hefst um 10 km ganga um undraheima Jökulsárgljúfurs að Hljóðaklettum. Þeir sem kjósa styttri göngu skoða sig um í Hólmatungum og fara svo með rútunni í Hljóðakletta en þar er hægt að velja um nokkar mismunandi gönguleiðir.

Frá Hljóðaklettum er ekið sem leið liggur um Kelduhverfi og Tjörnes til Húsavíkur en þar verður stoppað í tvær klukkustundir. Á Húsavík hafa þátttakendur frjálsan tíma en þeir geta t.d. farið í Sjóböðin eða skoðað sig um í bænum en þar eru margir spennandi veitingastaðir. Áætluð koma til Akureyrar er um kl. 21:00. 

Þann 3. september 2022 bjóðum við ferðina Jökulsárgljúfur II sem er nokkurs konar framhald af þessari ferð. Þá verður neðri hluti gljúfranna genginn, frá Ásbyrgi í Hljóðakletta.

Ferðaáætlun

Jökulsárgljúfur I, efri hluti gljúfranna.

Frábært tækifæri til að upplifa einstaka fegurð Jökulsárgljúfra. Hægt að velja langar og stuttar gönguleiðir.

  • Fossaröðin Selfoss, Dettifoss og Hafragilsfoss.
  • Hólmatungur
  • Hljóðaklettar
  • Húsavík, hægt að fara í Sjóböðin eða skoða sig um í bænum.

Hvað þarf að taka með

  • Nesti og drykkir fyrir daginn.
  • Fatnaður sem hæfir veðri og aðstæðum.
  • Góðir gönguskór.
  • Göngustafir.
  • Vaðskór og lítið handklæði.
  • Sundfatnaður og handklæði fyrir þá sem ætla í Sjóböðin á Húsavík.

Tungumál leiðsögumanns

  • Íslenska